Монголын үндэсний уламжлалт тоглоомын нэгэн төрөл болох шагайн наадгайг 21-р зуун буюу техник технологийн эрин үед өнөөгийн хүүхэд залуус, ирээдүй хойч маань тоглох нь багасаж улмаар мартагдахад хүрч байна. Энэхүү судалгааны ажлын хүрээнд дүрсийн боловсруулалт ашиглан шагай тоглодог робот гарыг зохион бүтээх зорилготой. Ажлын эхний алхам нь камер ашиглан шагайн дүрсийг авч, тухайн дүрсийг хар цагаан болгон хувиргах үйлдлийг хийнэ. Үүний дараа ирмэг илрүүлэлтийн (edge) аргаар шагайн зургийг нэг битийн өргөнтэй дүрс болгон хөрвүүлж гинжин (chain) кодыг үүсгэх бөгөөд түүгээрээ өгөгдлийн сан үүсгэнэ. Робот гарны ажиллах процесс нь тухайн агшинд хаясан шагайн дүрсийг гинжин код болгон хөрвүүлж, өгөгдлийн сан дахь гинжин кодуудтай харьцуулан морь буусан эсэхийг танина.